श्रीमच्छङ्करदेशिकेन्द्ररचिते तुङ्गापगातीरगे शृङ्गेर्याख्यपुरस्थिते सुविमले सन्मौनिसंसेविते । पीठे तां रविकोटिदीप्तिसहितां राराज्यमानां शिवां राजीवाक्षमुखामरार्चितपदां वन्दे सदा शारदाम् ॥ १ ॥

śrīmacchaṅkaradeśikendraracite tuṅgāpagātīrage śṛṅgeryākhyapurasthite suvimale sanmaunisaṃsevite ; pīṭhe tāṃ ravikoṭidīptisahitāṃ rārājyamānāṃ śivāṃ rājīvākṣamukhāmarārcitapadāṃ vande sadā śāradām . 1 .

पादानम्रजनार्तिनाशनिपुणां नादानुसन्धायिनीं वेदान्तप्रतिपाद्यमानविभवां वादादिशक्तिप्रदाम् । विद्याकल्पलतां चतुर्मुखमुखाम्भोजातसूर्यायितां विद्यातीर्थगुरूत्तमैरहरहः संसेव्यमानां भजे ॥ २ ॥

pādānamrajanārtināśanipuṇāṃ nādānusandhāyinīṃ vedāntapratipādyamānavibhavāṃ vādādiśaktipradām ; vidyākalpalatāṃ caturmukhamukhāmbhojātasūryāyitāṃ vidyātīrthagurūttamairaharahaḥ saṃsevyamānāṃ bhaje . 2 .

ईषत्स्मेरमुखाम्बुजां कुचभरानम्रां त्रिलोकावनीं दैत्यव्रातविनाशिनीं कचजितप्रावृट्पयोदां शिवम् । संसारार्णवमग्नदीनजनतासन्तापसन्नाशिनीं वन्दे तां शुभदामनन्यशरणः स्वान्ते सदा शारदाम् ॥ ३ ॥

īṣatsmeramukhāmbujāṃ kucabharānamrāṃ trilokāvanīṃ daityavrātavināśinīṃ kacajitaprāvṛṭpayodāṃ śivam ; saṃsārārṇavamagnadīnajanatāsantāpasannāśinīṃ vande tāṃ śubhadāmananyaśaraṇaḥ svānte sadā śāradām . 3 .

कारुण्यामृतवारिराशिमनिशं केयूरहारैर्वृतां कामारेस्सहजां कराब्जविलसत्कीरां कुबेरार्चिताम् । कामक्रोधमुखारिवर्गशमनीं कैवल्यसम्पत्प्रदां कञ्जोद्भूतमनःप्रियां हृदि भजे भक्त्या सदा शारदाम् ॥ ४ ॥

kāruṇyāmṛtavārirāśimaniśaṃ keyūrahārairvṛtāṃ kāmāressahajāṃ karābjavilasatkīrāṃ kuberārcitām ; kāmakrodhamukhārivargaśamanīṃ kaivalyasampatpradāṃ kañjodbhūtamanaḥpriyāṃ hṛdi bhaje bhaktyā sadā śāradām . 4 .

नित्याऽनित्यविवेकदाननिपुणां स्तुत्यां मुकुन्दादिभिः यत्याकारशशाङ्कमौलिविनुतां सत्यापितस्वाश्रवाम् । नत्या केवलमेव तुष्टहृदयां त्यक्त्वाऽन्यदेवानहं भक्त्या मे हृदयाम्बुजेऽनवरतं वन्दे सदा शारदाम् ॥ ५ ॥

nityā’nityavivekadānanipuṇāṃ stutyāṃ mukundādibhiḥ yatyākāraśaśāṅkamaulivinutāṃ satyāpitasvāśravām ; natyā kevalameva tuṣṭahṛdayāṃ tyaktvā’nyadevānahaṃ bhaktyā me hṛdayāmbuje’navarataṃ vande sadā śāradām . 5 .