दक्षिणाम्नायशृङ्गेरीशारदापीठाधीश्वर-जगद्गुरु-शङ्कराचार्य-श्रीश्रीश्रीभारतीतीर्थ-महास्वामिकरकमलसञ्जातैः जगद्गुरु-श्रीविधुशेखरभारतीमहास्वामिभिः विरचिता
dakṣiṇāmnāyaśṛṅgerīśāradāpīṭhādhīśvara-jagadguru-śaṅkarācārya-śrīśrīśrībhāratītīrtha-mahāsvāmikarakamalasañjātaiḥ jagadguru-śrīvidhuśekharabhāratīmahāsvāmibhiḥ viracitā
दक्षिणाम्नायशृङ्गेरीशारदापीठभूषणम् ।
नमामि भारतीतीर्थं दक्षिणास्यनवाकृतिम् ॥१॥
dakṣiṇāmnāyaśṛṅgerīśāradāpīṭhabhūṣaṇam ;
namāmi bhāratītīrthaṃ dakṣiṇāsyanavākṛtim .1.
करुणारसनिष्यन्दिसरसापाङ्गवीक्षणम् ।
कटाक्षपातनिर्धूतपापौघं कलये गुरुम् ॥२॥
karuṇārasaniṣyandisarasāpāṅgavīkṣaṇam ;
kaṭākṣapātanirdhūtapāpaughaṃ kalaye gurum .2.
दिग्वारणसुहृत्कीर्तिराजितं सङ्गवर्जितम् ।
कामादिद्विपपञ्चास्यं भजे भर्गार्चनोत्सुकम् ॥३॥
digvāraṇasuhṛtkīrtirājitaṃ saṅgavarjitam ;
kāmādidvipapañcāsyaṃ bhaje bhargārcanotsukam .3.
माधवोमाधवाभेदधिषणं भिषजं कलेः ।
प्रज्ञानिधिं नमस्यामि गूढतत्त्वावबोधकम् ॥४॥
mādhavomādhavābhedadhiṣaṇaṃ bhiṣajaṃ kaleḥ ;
prajñānidhiṃ namasyāmi gūḍhatattvāvabodhakam .4.
शमादिसुगुणस्तोमभूषितं यमिनां वरम् ।
योगमार्गरतं नौमि योगक्षेमकृतं सदा ॥५॥
śamādisuguṇastomabhūṣitaṃ yamināṃ varam ;
yogamārgarataṃ naumi yogakṣemakṛtaṃ sadā .5.
विद्यां विज्ञावलिर्वक्ति विमलां यं वपुष्मतीम् ।
विभूत्यै वचसां वन्दे विनीतो विश्ववन्दितम् ॥६॥
vidyāṃ vijñāvalirvakti vimalāṃ yaṃ vapuṣmatīm ;
vibhūtyai vacasāṃ vande vinīto viśvavanditam .6.
श्रुतिस्मृतिसदाचारपरित्राणविधौ भुवि ।
प्रभूतां प्रभुतां धत्ते यस्तं संस्तौमि सन्ततम् ॥७॥
śrutismṛtisadācāraparitrāṇavidhau bhuvi ;
prabhūtāṃ prabhutāṃ dhatte yastaṃ saṃstaumi santatam .7.
यद्वाग्झरी सुपर्वाध्वतरङ्गिण्यवधीरिणी ।
सञ्चारपूतधरणिः पात्वाचार्यशिरोमणिः ॥८॥
yadvāgjharī suparvādhvataraṅgiṇyavadhīriṇī ;
sañcārapūtadharaṇiḥ pātvācāryaśiromaṇiḥ .8.
अनन्तोऽपि हृदाकाशे दहरे भासतेतराम् ।
ईडे श्रुतिशिरोवेद्यं परिपूर्णं गुरूद्वहम् ॥९॥
ananto’pi hṛdākāśe dahare bhāsatetarām ;
īḍe śrutiśirovedyaṃ paripūrṇaṃ gurūdvaham .9.
राजाधिराजसंसेव्यं राजविद्यागुरुं श्रये ।
शिष्यालिवन्द्यपादाब्जं भारतीतीर्थदेशिकम् ॥१०॥
rājādhirājasaṃsevyaṃ rājavidyāguruṃ śraye ;
śiṣyālivandyapādābjaṃ bhāratītīrthadeśikam .10.
॥ इति दक्षिणाम्नायशृङ्गेरीशारदापीठाधीश्वर-जगद्गुरु-शङ्कराचार्य-श्रीश्रीश्रीभारतीतीर्थ-महास्वामिकरकमलसञ्जातैः जगद्गुरु-श्रीविधुशेखरभारतीमहास्वामिभिः विरचिता गुरुवर्यदशश्लोकी ॥
. iti dakṣiṇāmnāyaśṛṅgerīśāradāpīṭhādhīśvara-jagadguru-śaṅkarācārya-śrīśrīśrībhāratītīrtha-mahāsvāmikarakamalasañjātaiḥ jagadguru-śrīvidhuśekharabhāratīmahāsvāmibhiḥ viracitā guruvaryadaśaślokī .
